Алматы — туристік орталық ретіндегі позициясын нығайтуда: 2024 жылдың қорытындысы және 2025 жылға жоспарлар

Соңғы жылдары Алматы Қазақстандағы жетекші туристік орталықтардың бірі ретінде қарқынды дамып келеді. Қала шетелдік және отандық туристерді бірегей табиғатымен, заманауи инфрақұрылымымен және түрлі туристік мүмкіндіктерімен баурап отыр.

2024 жылы Алматының туризм саласында айтарлықтай өсім байқалды. Туристердің жалпы саны 14,2%-ға артып, 1,7 миллион адамға жетті. Шетелдік қонақтардың саны 23,9%-ға өсіп, 507,5 мыңнан асты. Ішкі туристер саны 1,2 миллионды құрады — бұл өткен жылмен салыстырғанда 10,6%-ға артық.

Саланың басым бағыттарының бірі — туризм саласы мамандарының біліктілігін арттыру болды. 2024 жылы көлік тораптарында және туристермен тікелей жұмыс істейтін қызметкерлер үшін ағылшын тілі курстары өткізілді. Гидтерге арналған оқу бағдарламалары Дүниежүзілік туристік гидтер қауымдастықтары федерациясының (WFTGA) стандарттарына сай ұйымдастырылды, сондай-ақ құтқарушыларға арналған арнайы тренингтер де өтті.

Алматыны халықаралық аренада ілгерілету мақсатында қала өкілдері жеті ірі туристік көрмеге қатысып, Шанхайда, Гонконгта, Сианьде және Бейжіңде Алматы Туризм Күндерін өткізді. Бұл шетелдік серіктестермен келісімдерге қол қойып, халықаралық ынтымақтастықты нығайтуға мүмкіндік берді. Сонымен қатар, 11 елден келген 90 туристік компания өкілдеріне арналған ақпараттық турлар ұйымдастырылды.

2025 жылы туристік инфрақұрылымды әрі қарай дамыту жоспарланған: кемпинг аймақтарын кеңейту, тау маршруттарын абаттандыру көзделіп отыр. Халықаралық деңгейде ілгерілету жұмыстары 10 туристік көрмеге және 4 MICE іс-шараға қатысу, сондай-ақ шетелде Алматы Туризм Күндерін өткізумен жалғасады.

Алматы қаласының туристік әлеуетін таныстыратын маңызды алаң — 2025 жылдың 23–25 сәуірі аралығында «Атакент» көрме орталығында өтетін KITF 2025 көрмесі болмақ. Бұл оқиға Алматы қаласының Туризм басқармасы үшін аса маңызды, өйткені KITF Қазақстан мен шетелдің туристік индустрия өкілдерін біріктіреді. Көрмеге қатысу — іскерлік байланыстар орнату, қаланың туристік әлеуетін таныстыру және Алматыға деген қызығушылықты арттырудың тамаша мүмкіндігі. Басқарманың стендінде бизнес-қонақтарды қарсы алып, Алматының туристік мүмкіндіктері туралы ақпарат беріп, халықаралық серіктестікті нығайту көзделіп отыр.